ტარიფის «კომფორტ+» სტანდარტების დაცვის შემოწმება იდუმალი მომხმარებლის მიერ

ჩვენ ვცდილობთ, ტარიფით «კომფორტ+» შესრულებული ყველა მგზავრობა შეესაბამებოდეს სტანდარტებს. სტანდარტები ხაზს უსვამს მძღოლის პროფესიონალიზმს მგზავრთა თვალში. სტანდარტების დაცვას რამდენიმე საშუალებით ვამოწმებთ. ერთ‑ერთი მათგანია იდუმალი მომხმარებლების მიერ შემოწმება.

იდუმალი მომხმარებლები მგზავრობენ ჩვეულებრივი მგზავრებივით, ამიტომ შეკვეთის შესრულების პროცესში ვერ მიხვდებით, რომ გამოწმებენ. მათი შეკვეთებიც ისევე ნაწილდება, როგორც ჩვეულებრივი მომხმარებლების შეკვეთები. ამგვარი მიდგომა ხელს უწყობს მართლაც შემთხვევით შემოწმებას, მძღოლს კი ეხმარება იმის უფრო ზუსტად განსაზღვრაში, თუ რისი გამოსწორებაა საჭირო მგზავრობის კუთხით.

შემოწმებების დაწყებამდე ყველა იდუმალი მომხმარებელი გადის მომზადებას სერვისის წესებსა და ტარიფების სტანდარტებში. მათ იციან, რა უნდა იქცეოდეს მძღოლი მგზავრობის ამა თუ იმ მომენტში, მათ შორის არასტანდარტულ სიტუაციებში. იდუმალი მომხმარებლები შემოწმებას ატარებენ ობიექტურად და მიუკერძოებლად. მათი მიზანია, დააფიქსირონ, რამდენად ზუსტადაა დაცული ხარისხის სტანდარტები კონკრეტული ტარიფით მგზავრობისას.

შემოწმების მიმდინარეობა

იდუმალი მომხმარებლები გულდასმით ავსებენ ანგარიშს თქვენთან ერთად მგზავრობის შესახებ. ისინი იტყობინებიან, რამდენად ზუსტად იცავთ ტარიფის სტანდარტებს და რა შთაბეჭდილება დარჩათ ზოგადად მგზავრობის შემდეგ.

მგზავრობის შესახებ ანგარიშს იდუმალი მომხმარებლები ურთავენ ავტომობილის ძარასა და სალონის ფოტოებსა და ვიდეოებს. თუ მგზავრობისას დარღვევები იყო, ისინი ფიქსირდება ფოტოებზე და დეტალურად აღიწერება კომენტარებში.

⚠️ აღნიშნულ მასალებზე წვდომა მხოლოდ ხარისხის კონტროლისა და მხარდაჭერის სამსახურის თანამშრომლებს აქვთ.

მგზავრობის შესახებ იდუმალი მომხმარებლის ანგარიშს შეამოწმებენ ხარისხის კონტროლის სპეციალისტები. ისინი უნდა დარწმუნდნენ, რომ ანგარიში სწორადაა შევსებული. ამ მიზნით, ისინი შეადარებენ იდუმალი მომხმარებლის მიერ მოწოდებულ მასალებს სერვისის შიდა სისტემების მონაცემებს.

შემოწმებისშემდგომი ნაბიჯები

ანგარიშის სისწორის დადასტურების შემთხვევაში Yandex Pro‑ს ჩატში მიიღებთ შეტყობინებას იდუმალი მომხმარებლის მიერ ჩატარებული შემოწმების შესახებ. შეტყობინებაში მოცემული იქნება დეტალური ანგარიშის ბმული — გაეცანით მას.

თუ შემოწმება დარღვევების გარეშე ჩაივლის, ჩვენგან მიიღებთ სამადლობელ შეტყობინებასა და პრიორიტეტის დამატებით 2 ქულას ერთი კვირით. პრიორიტეტი აისახება შეკვეთების მიღებაზე. დარღვევებს, მათი სერიოზულობის მიხედვით, შესაძლოა, მოჰყვეს:

— გაფრთხილება;

— პრიორიტეტის შემცირება 2 კვირით ‑2 ქულით ანგარიშში მოცემული თითოეული დარღვევისთვის (მაქსიმუმ ‑8 ქულა);

— მგზავრობის იმ ტარიფზე წვდომის დაკარგვა, რომლის მიხედვითაც შეგამოწმეს (ასევე, უფრო მაღალ ტარიფებზე). წვდომის აღდგენა შესაძლებელი იქნება ტესტირებისა და ვიდეოინტერვიუს გამეორებით გავლის შემდეგ.

ტესტის მეშვეობით ტარიფში დაბრუნება შესაძლებელია ნახევარ წელიწადში მაქსიმუმ სამჯერ. თუ ტარიფზე წვდომას მეოთხედაც დაკარგავთ, აღდგენის მომდევნო შესაძლებლობა მხოლოდ ნახევარ წელიწადში გექნებათ. ანალოგიური წესები მოქმედებს რეიტინგით გამოწვეული შეზღუდვების დროს. როცა ყველა მცდელობა ამოიწურება, ამის შესახებ Yandex Pro‑ს ჩატში შეგატყობინებთ.

⚠️ მნიშვნელოვანია: თუ მგზავრობის შესახებ ანგარიშში 5 ან მეტი დარღვევა იქნება, ტარიფზე წვდომის დაკარგვის საფრთხე მაინც შეიქმნება, თუნდაც მსგავსი დარღვევებისთვის გათვალისწინებული იყოს მხოლოდ გაფრთხილებები.

თუ იდუმალი მომხმარებელი სტანდარტების დარღვევებს გამოავლენს, მაგრამ, ამავე დროს, ბოლო 400 მგზავრობის მანძილზე თქვენი რეიტინგი შეადგენდა 5,0‑ს, ან სხვა იდუმალი მომხმარებლების მიერ ჩატარებული ბოლო ორი შემოწმებისას დარღვევები არ გამოვლენილა, ტარიფზე წვდომა არ შეგეზღუდებათ. ამასთან, მსგავსი რამ შესაძლებელია ნახევარ წელიწადში მხოლოდ ერთხელ.

ანგარიშში აღნიშნული დარღვევების გაანალიზების შემდეგ, შესაძლოა, დაგიკავშირდეთ, რომ შემოწმების შედეგებზე ვიმსჯელოთ. ერთად განვიხილავთ ნაკლოვანებებს და მათ გამოსწორებაში დაგეხმარებით.

ტარიფზე წვდომის დაბრუნების წესები

შედით პროფილში Yandex Pro‑დან → გადადით ტარიფებზე → აირჩიეთ სასურველი → იპოვეთ კურსი, გაიარეთ ტესტირება და ჩაეწერეთ ვიდეოინტერვიუზე. დანიშნულ დროს დაგიკავშირდებათ ჩვენი თანამშრომელი. წარმატებული ტესტირებისა და ვიდეოინტერვიუს შემდეგ ტარიფზე წვდომა აღგიდგებათ.

თუ დარწმუნებული ხართ, რომ დარღვევები არ ყოფილა და წვდომა არასამართლიანად შეგეზღუდათ, მისწერეთ მხარდაჭერის სამსახურს. ჩვენ კიდევ ერთხელ შევამოწმებთ იდუმალი მომხმარებლის ანგარიშს და შევადარებთ მას მგზავრობის დროს გადაღებულ ფოტოებსა და ვიდეოებს, რომლებითაც შესაძლებელი იქნება დარღვევის ფაქტის დადასტურება ან უარყოფა. იდუმალი მომხმარებლის კონფიდენციალურობის დაცვის მიზნით, აღნიშნული მასალები არ ქვეყნდება და არ გადაეცემა მძღოლებს.

თუ დადასტურდება, რომ იდუმალმა მომხმარებელმა დარღვევა შეცდომით მონიშნა, შეზღუდვები მოგეხსნებათ და მიიღებთ პრომოკოდს პრიორიტეტის 2 ქულისთვის 10 დღით. თუ ამ შემოწმების შედეგად ტარიფზე წვდომა დაგებლოკათ, დამატებით გადმოგცემთ პრომოკოდს, რომელიც შეამცირებს სერვისის საკომისიოს ერთი დღით. მისი გააქტიურებისას სერვისის საკომისიოს ოდენობა იქნება 1 ₾ .