განსაკუთრებული სურვილები მგზავრობასთან დაკავშირებით

შეზღუდული შესაძლებლობების მქონე მგზავრების სურვილები ამიერიდან შეკვეთის ბარათში ჩანს. სერვისში არის ვარიანტები, რომელთა არჩევაც მგზავრს საჭიროებისამებრ შეუძლია — მაგალითად, თუ მომხმარებელი უსინათლოა და მას ავტომობილის პოვნასთან დაკავშირებით დახმარება სჭირდება.

როცა მომხმარებელი ირჩევს ამა თუ იმ ვარიანტს, მძღოლი ამას შეკვეთისთვის დართულ კომენტარში ხედავს.

უშუალოდ მომხმარებელთან იქონიეთ კომუნიკაცია, თუნდაც ის თანმხლებ პირთან ერთად მგზავრობდეს. ჯერ მიესალმეთ მას და მხოლოდ ამის შემდეგ — მის თანამგზავრს.

როცა მგზავრობისას არჩეულია სპეციალური ვარიანტები, აუცილებელია თავაზიანად დააზუსტოთ მომხმარებელთან, სჭირდება თუ არა მას რაიმე სახის დახმარება. თუ ის უარზე იქნება, ნუ დაიჟინებთ.

«უსინათლო ან ნაკლებად მობილური ადამიანი — დაეხმარეთ ტაქსის პოვნაში»

დახმარება, შესაძლოა, ნებისმიერ მგზავრს დასჭირდეს. მაგალითად, მხედველობადაქვეითებული ან უსინათლო მომხმარებელი ვერ ხედავს ავტომობილის ნომერს და ფერს, ის ვერც ავტომობილის კარის სახელურს პოულობს. შშმ პირის სავარძელში მსხდომ მომხმარებლებს ეს ვარიანტი გამოადგებათ იმ შემთხვევისთვის, რომ მძღოლმა დაინახოს კომენტარი და შეძლებისდაგვარად ახლოს გააჩეროს ავტომობილი.

მხედველობადაქვეითებული ადამიანის ამოცნობა შესაძლებელია თეთრი ხელჯოხით ან მუქმინიანი სათვალით. თუ მგზავრს არ დაუტოვებია კომენტარი, როგორ და სად უნდა იპოვოთ, დაურეკეთ მას. შემდეგ კი:

• მგზავრთან მაქსიმალურად ახლოს გააჩერეთ ავტომობილი. დარწმუნდით, რომ ავტომობილთან მისასვლელი გზა უსაფრთხოა — კერძოდ, რომ იქ არ არის მაღალი ბორდიურები, ბარიერები ან სხვა დაბრკოლებები;

• თუ მგზავრი უსინათლოა, მიდით მასთან, მიესალმეთ და ოდნავ შეეხეთ ხელზე. ჰკითხეთ, სჭირდება თუ არა დახმარება ავტომობილში ჩაჯდომისას: «გამარჯობა, ტაქსის მძღოლი ვარ. დაგეხმაროთ ავტომობილში ჩაჯდომაში?»;

მგზავრს ავტომობილამდე მისვლაში რომ დაეხმაროთ, შესთავაზეთ მას, ხელზე ხელი მოგკიდოთ და გამოგყვეთ. ავტომობილთან მიახლოებისას მგზავრს ავტომობილის კარის სახელურზე დაადებინეთ ხელი. თუ მგზავრს კარს თავად უღებთ, დაეხმარეთ მას, უსაფრთხოდ მოთავსდეს სალონში.

• მგზავრობის დასრულებამდე რამდენიმე წუთით ადრე უთხარით მგზავრს, რომ მალე იქნებით დანიშნულების ადგილზე;

• დაიმახსოვრეთ, რომ თქვენი მგზავრი ვერ ხედავს ჟესტებს. ადგილმდებარეობის ახსნისას გამოიყენეთ ფრაზები: თქვენგან მარჯვნივ, თქვენგან მარცხნივ, თქვენ წინ, თქვენ უკან, ზემოთ, ქვემოთ და ა.შ.

• მგზავრობის დასასრულს დაწვრილებით აუხსენით, სად გაჩერდით — რა ორიენტირებია ირგვლივ. მაგალითად: «საყოფაცხოვრებო მაღაზიასთან მოვედით. აქ გაგიჩეროთ?»;

• თუ უსინათლო მგზავრი ნაღდი ანგარიშსწორებით იხდის, ხმამაღლა უთხარით მგზავრობის საფასური და დაუსახელეთ ხურდის ოდენობა;

• შეამოწმეთ, რომ ავტომობილიდან გადასვლისას რაიმე დაბრკოლება არ იყოს და მგზავრს დახმარება შესთავაზეთ.

დარწმუნდით, რომ მას არაფერი დარჩენია სალონში.

«მხოლოდ მიმოწერა შემიძლია»

მგზავრს, რომელმაც ეს ვარიანტი აირჩია, შესაძლოა, ჰქონდეს სმენის ან მეტყველების პრობლემა. შეკვეთის დეტალების დასაზუსტებლად მასთან დარეკვა არ ღირს, ჯობს მგზავრობამდე ჩატში მიწეროთ.

«ვერ ვლაპარაკობ, მაგრამ მესმის»

თუ მომხმარებელმა ეს ვარიანტი მიუთითა, შესაძლოა, მას მეტყველების პრობლემა ჰქონდეს. ასეთი მგზავრი გაიგონებს თქვენს შეკითხვას, მაგრამ ტექსტის მეშვეობით გიპასუხებთ.

«შშმ პირის სავარძლით ვიქნები»

თუ მომხმარებელმა ეს ვარიანტი აირჩია, კომენტარებში დაგხვდებათ ასეთი ტექსტი: «შშმ პირის სავარძლით ვიქნები. მჭირდება ცარიელი საბარგული და დახმარება ჩაჯდომისას.»

შშმ პირის სავარძლით მოსარგებლე ადამიანებისთვის ქალაქში გადაადგილება მარტივი არ არის და ავტომობილში ჩაჯდომისას, შესაძლოა, მეტი დრო დასჭირდეთ. მგზავრობამ თქვენთვისაც და მგზავრისთვისაც კარგად რომ ჩაიაროს, დაიცავით რამდენიმე წესი:

• რაც შეიძლება ახლოს გააჩერეთ ავტომობილი, რომ შშმ სავარძლით მოსარგებლე მგზავრმა უსაფრთხოდ და მოხერხებულად შეძლოს ავტომობილთან მოახლოება;

• ჰკითხეთ მგზავრს, სჭირდება თუ არა დახმარება სავარძლიდან ავტომობილში გადაჯდომისას, სავარძელი კი საბარგულში შეინახეთ. მგზავრს, შესაძლოა, ვინმე ახლდეს, მაგრამ მაინც შესთავაზეთ დახმარება;

• დააზუსტეთ, როგორ იკეცება სავარძელი — მაგალითად, როგორ ეხსნება ბორბლები. ზოგიერთ სავარძელს მძიმე ელექტრონული ბლოკი აქვს, რომელიც უნდა გამოერთდეს სავარძლიდან და საბარგულში მოთავსდეს;

• დარწმუნდით, რომ მგზავრი მოხერხებულად მოეწყო სალონში;

• მგზავრობის დასასრულსაც შესთავაზეთ მას დახმარება.

მოძრაობის სერიოზული დარღვევის მქონე ზოგიერთ ადამიანს მეტყველება უჭირს. მათ შეიძლება შესანიშნავად ესმოდეთ თქვენი ნათქვამი, მაგრამ საუბარს ვერ ახერხებდნენ. ასეთ შემთხვევაში, ადამიანს შეუძლია აირჩიოს ვარიანტი «მხოლოდ მიმოწერა შემიძლია» ან «ვერ ვლაპარაკობ, მაგრამ მესმის».

სავარძლის აწყობის ინსტრუქციის სანახავად Yandex Pro‑ს აპლიკაციაში აირჩიეთ: პროფილი → სასარგებლო რჩევები.

თუ შშმ პირის სავარძელი არ თავსდება საბარგულში, გააუქმეთ შეკვეთა და მიწერეთ მხარდაჭერის სამსახურს.

დეტალურ ინფორმაციას შეზღუდული შესაძლებლობების მქონე მგზავრების შესახებ გაეცანით ამ სტატიაში.